ភ្នំពេញ៖ សម្ដេចតេជោ ហ៊ុន សែន មានប្រសាសន៍ថាក្នុងដំណើទស្សនៈកិច្ចសម្ដេចទៅប្រទេសចិន ក្នុងជំនួបជាមួយប្រធានាធិបតីចិន បានពិភាក្សាបើកច្រកទេសចរណ៍ចិនមកកាន់កម្ពុជាបន្ថែមទៀតឱ្យបានប្រមាណ ១ សប្ដាហ៍ ៣០០ ជើងហោះហើរ ខណៈកម្ពុជាធ្លាប់បានទទួលទេសចរចិនមុនកូវីដ-១៩ ជាង ២លាននាក់។
សម្តេចតេជោលើកឡើងក្នុងពិធីប្រគល់សញ្ញាបត្រជូនដល់និស្សិតនៃវិទ្យាស្ថានវ៉ាន់ដា នៅមជ្ឈមណ្ឌលសន្និបាត និង ពិព័រណ៍កោះពេជ្រ ថ្ងៃទី២២ ខែមីនា ឆ្នាំ២០២៣នេះ ថាប្រធានាធិបតីចិន លោក ស៊ី ជិនពីង បានបញ្ជាក់ដល់សម្ដេចតេជោថា កម្ពុជាជាប្រទេសទី១ ដែលបើកទទួលភ្ញៀវទេសចរចិនឡើងវិញ។
សម្ដេចតេជោ មានប្រសាសន៍ថា៖ «បើយោងតាមគម្រោង គឺមួយសប្តាហ៍ ៣០០ជើងហោះហើរ បើចឹងទេសចរចិនបើបាន៣ ៤ ទៅ៥លាននាក់ក្នុងមួយឆ្នាំគឺជាការល្អ»។
ជាមួយគ្នានេះដែរ សម្ដេចតេជោ បានបញ្ជាក់ថា ថៃជាប្រទេសធំ ហើយនៅតែប្រឹងប្រែងទាក់ទាញទេសចរចិនឲ្យបាន ១០លាននាក់ក្នុងមួយឆ្នាំ ខណៈប្រទេសសិង្ហបុរីក៏ព្យាយាមទាក់ទាញទេសចរចិន ហើយប្រទេសផ្សេងៗទៀតក៏ដូចគ្នាដែរ។
គួរឱ្យដឹងដែរថា ក្នុងឆ្នាំ២០១៨ កម្ពុជាទទួលបានអ្នកទេសចរចិនប្រមាណមានជាង ២,៣លាននាក់ ស្មើនឹង ៣៥,៧% នៃទេសចរអន្តរជាតិសរុប (៦,៦លាននាក់)។ ដោយឡែកបន្ទាប់ពីវិបត្តិកូវីដ-១៩ កម្ពុជារំពឹងថានឹងទទួលបានទេសចរអន្តរជាតិប្រមាណ ៧លាននាក់ នៅឆ្នាំ២០២៥ ដូចការគ្រោងទុកក្នុង ផែនទីចង្អុលផ្លូវស្តីពីផែនការស្តារ និងលើកស្ទួយវិស័យទេសចរណ៍កម្ពុជាក្នុងនិងក្រោយវិបត្តិជំងឺកូវីដ-១៩៕
